nadimy.narod.ru

 
 ЛЫЗ ПИОСМУРТ карта сайта кутскон бам
Кылбур
Проза
Берыктэм ужъёс
Выль лыдӟет
Библиографие
Патрет
Гожты мыным
© 2005-2006 Petrov2

ЛЫЗ ПИОСМУРТ

Арво Валтон

Уин лыктӥз лыз пиосмурт, соку мадам Мандрагола кылӥськемын вал ини, табере дӥсяз ӟоскыт уй дӥсьсэ, шер луыны кутскись йырси вылаз огдышемен понӥз уй чепчиксэ, озьы варгаз кылем валесаз выдӥз.

Нуназе кышномурт, уно калык полтӥ донгаськыса ик чаклаз, кызьы вато куасьмыны кутскем еремитэз (юбо йылын пукись святоез), табере тани сое монастырь борддоръёс басьтозы но выж улъёсазы ватозы, нош отын азьвыл кулэм святойёс асьсэлэсь дауръёслы выльысь улземзэс витьыса уло. Нуназе ортчем ужрадъёслэн таӵе син азе пыр-поч пуксьымон суредъёссы, тужгес но курень мумиос, – монастырьын кемалась дырысен улэмъёс, табере та интылэн святой мощиосыз, – султӥзы Мандраголалэн син азяз; тини соку ӧс пыр кышномуртлэн болетаз пыӵаз пеймыт-лыз пиосмурт, – но та ой вал чылкак витьымтэ шорысь луэм уж.

Ӝытпал Мандрагола ӧссэ туж тыршыса пытсаз вал, кышканъёссэ уллян понна, пытсэтъёсты пулэн пыкъяз на. Но лыз пиосмуртэ ӧз куты тыпы пул но, вамен корт но. Татчы пырон понна, солы пытсэтъёс борды йӧтскыны но кулэ ӧй вал, со шыпыт матэктӥз кышномурт доры.

Мандрагола ӧз куалекты, кемалась тодиз ини: лыз пиосмуртэ куке но соку пумитано луоз. Кышномуртлэн лулыз та пумиськонлы дась вал ини: туннэ-а вуоз лыз пиосмурт, яке ӵуказе-а, – ваньмыз огкадь.

Лыз пиосмурт каллен матэктӥз валес доры, Мандрагола вадьсы мыкырскиз, кышномуртлэсь шобрет улысь потэм пыдпыдэссэ кузь чиньыосыныз маялляны кутскиз. Чиньыосыз кезьытэсь, кузесь вал, но Мандрагола ӧз шуысалыз: та йӧтскемъёс солы чылкак уг кельшо, али ӝутскем мылкыдыныз со быгатӥз валаны йӧтскемъёслэсь ческытсэс.

— Озьыен, тон табере татын, — шуиз лыз пиосмурт, солэн тазьы верамаз тэрытэмын вал пӧртэм пуштросъёс. Кытын луоно на Мандрагола госпожалы, аслаз катэн чаклам, законной, валесаз сяна, уго та валес солы кылемын сопал дуннее кошкем картэзлэсь. Валес со юртлэсь но бадӟым луись маке, отын герӟаське тысь но улон инъет, отысен ик куке но вылӥе инме ӝутскоз берпуметӥез шокчемед но.

— Кин тон, малы лыктӥд? — юаз Мандрагола кышкатэк, аслэсьтыз та улонын интызэ ӟеч тодӥсь мурт сямен.

— Тон Афазий святоез виись мурт, — шуиз лыз пиосмурт эшлыко мылкыдын. Малпалод, та кылъёссэ веракуз, со Ратуша котыртӥ ветлыса, мыло-кыдо но котыр ласянь эскериз юртлэсь мырк йылзэ. Но госпожа аслыз ачиз вылӥ кивалтэт вал, пукиз тронлэн шораз; кузесь чиньыос, пыд вылтӥз гылӟыса, шобрет улэ пыризы, ӧжыт но шуналлямтэ соос кышномуртлэн пӧсь мугораз йӧтскыса.

— Кытын верамын, Афазиез мон вии шуыса? Кытысь тодӥськод, марлэсь кулӥз со? — кышкатэк юаз Мандрагола.

— Бен, калык малпа, со юбо вылын пукемезлэсь кулӥз. Нош мон тодӥсько: тон сое виид, арня талэсь азьло тон солы сӥён нуид, нош отчы азьвыл ик яд суралтӥд вал, — каньылак гинэ валэктиз лыз пиосмурт. Солэн киыз госпожалэн пидес вадесозяз вуиз, та мугор интылэсь небытсэ ӟечгес шодон понна, лыз пиосмурт пал киыныз шобретэз палэнтиз. Та вырземаз шодӥськиз пиосмуртлэн витьыны чидамтэез, но вераськемез солэсь та мылкыдзэ ӧз возьматы, пал куараен но.

— Мон гинэ солы сиён ӧй нуллы, уго котькудизлы инбам ултӥ ветлись сирота луллы кулэ вал святойлэн со понна вӥсяськем кужымез. Кышноос пӧлысь котькудӥз быгатӥз сиён пушкы яд суралтыны, но ведь Афазий пал чиньыеныз но ӧз йӧтскылы вал сиён борды, котыраз бергась пуныос святойлэн ӟеченыз ӵушсэс утизы. Одӥг пунылэн но чоньдэмез сярысь ивор ӧз кылиськы, — шуиз Мандрагола, лыз пиосмуртлэсь малпанъёссэ мукет пала берыктыны тыршыса.

— Тынад яд суралтэм сиёнэд ик вуиз уго святойлэн ымаз, пунылы кулыны ӧз кылды, — шыпыт но юн куараен шуиз лыз пиосмурт. Со ваньзэ тодэ, соин ченгешыны кулэез ӧвӧл, малпалод. Озьы ке но, Мандрагола вазиз:

— Мон номыре но уг тодӥськы. Оло ӝажыысь кыӵе ке пиялаысь яд кисьтӥськиз ик шумесам, мульы войын нянь котыкум.

Кузь чиньыё ки каллен ӝутскиз пыд кузя выллань. Лыз пиосмурт шуиз:

— Ӧвӧл, тон ас киыныд ӝажыысь пияла посудаез кутӥд но отысь кызь шапык ядэз нянь шумесад кисьтӥд, святоез ядэн сюдыны малпад.

Пӧртэм югдуре шедьылэм Мандрагола ӧз кышка, пиосмурт ваньзэ, кызьы вал, озьы вераса сетӥз ке но. Малпалод, соку, кышномурт нянь котыку, та лыз пиосмурт возаз чакласькыса сылӥз. Кышномурт шуиз:

— Валэкты на, мар шуыса мон озьы ужасал?

— Таиз сярысь мынам аслам но тодэме потэ. Адын но, кышномуртлэн сюлэм мурдалаосаз кадь ик, тодмотэм пеймыт интыос вань, — шуиз пиосмурт. Солэн киыз вуиз кышномуртлэн пыд выжы дорозяз.

— Курадӟонэ сярысь шыпыт тэльмырыкум, юрттэт утчаса вӧсяськыкум, Афазий святой мыным уно пол юрттылӥз. Юбоез доры лыктыса гинэ, солэн буш синъёсаз учкыса гинэ мон выльысь буйгалляй, мон валай соку: котькудӥз адями аслэсьтыз кироссэ ачиз нуэ, мынам киросэ муртъёслэн киросъёсынызы ӵошатыса, секытгес ӧвӧл. Малы, мар малпаса, отын, кар сьӧрын, шундые пӧсь тырттэм интыын, виём мон та ӝыныё луло-лултэм мугорез?

— Бен, та уж тыныд выль ӧвӧл, азьвыл но тон озьы виылӥд. Вера али, мынам туж тодэме потэ, мар вырӟытиз тынэсьтыд та сьӧсь мылкыддэ. Котьмар ке но, мынам киы татчы йӧтскемын ӧвӧл, — лыз пиосмуртлэн киыз ӝутскиз Мандраголалэн кӧтаз, кӧй висъёсаз йыромыса ветлӥз. Кышномурт серемпыр шуиз:

— Кышкаськод-а со эшъёсыдлэсь, кудъёсыз азьпалтозы тонэ та ӧнерад? Соос тросгес шыпыртозы мискинь кышномуртъёслэн пельёсазы, кинэ сопал дуннее ядэн сюдыса лэзёно?

— Кышномурт, тон мынам ужъесам эн мерскы, — шуиз лыз пиосмурт. — Тынад лул вылад секыт ныпъет, тон ик малпаськы со сярысь. Пичи ныл дыръяд вешаськись пуныедлы яд сётӥд ук тон.

— Со мынэсьтым ӧз кылзӥськы вал, — шуиз Мандрагола, яд сетон удысын тодон-валанзэ возьматыса.

— Малы бен со тынэсьтыд кылзӥськыны кулэ вал? Пунылэн но куддыръя аслаз малпанъёсыз но ужъесыз вань, вылды. Ярам, пуныен луэм ужез кельтом. Тон картэдлы но, та юртэз но валесэз тыныд сётӥсь муртлы, яд удид ук. Нош со тонэ пумтэм шумпоттыны быгатэ вал, тодад вай али, кызьы тон куасалляськид но черектӥськылӥд со улын майбыр ненег шумпотонад!

Лыз пиосмуртлэн кезьыт киыз, мырдэм но кызьы кӧт кӧйлэн нюк-гопъёсысьтыз потыса, ноныос пала вырӟиз, каллен, кудӥз гурезь доры кожыны малпаса кадь. Мандрагола килэсь ортчем сюрессэ чакласа улиз, соин ик кышномуртлэн малпанъёсыз но пумозяз визьмын малпаськемын ӧй вал, верано кылъессэ со кескич котыръяны ӧз быгаты. Со шуиз:

— Картэ монэ тышка вал, сур вузась кышно доры кошкыны турттыса улӥз, ялан кышкатыса возиз монэ.

— Котькудӥз пиосмурт кышнозэ тышка. Кин киыныз, кин кылыныз, кин малпанъёсыныз. Ваньзы соос кышномуртэ мугоренызы донгало, инкуазь озьы тупатэм ини, ма карод. Тон одӥгезлэсь кышкад: картэд сур вузась доры кошкиз ке, та юрт тыныд уз донгиськы.

— Юрт — со ма гинэ. Ӟеч карт кышномурт понна быдэс город луыны быгатэ. Зэмос пиосмурт ке со.

Ноныос вискысь пӧсь ӵошкыт интыети йыромыса кадь ветлэмез бере, лыо ки бурзэ ноныез бырйиз, каллен гинэ, огдышем сямен, со ӝутскиз гурезьысь пус доры.

— Тынад соку ик вал ини аслэсьтыд дас ареслы егит туганэд. Кык пиосъёс, огзы борсьы огзы, ветлӥзы дорад, тон огкадь шокад соос улын.

— Кышномурт данъяське, сое ярато ке. Мар малпаса меда тон ачид татчы, монэн артэ, пуксид. Мон егит ӧвӧл ни табере, пиос шорам уг учко.

— Мынам уже тынад лулыд бордын. Тонэ эскереме потэ. Сыӵе ини мынам уже. Малы тон со егит тугандэ виид?

— Ачид тодӥськод, со мынэсьтым дас ареслы егит вал. Мар-о, мон солэсь кошкемзэ витьыса мед улом-а?

Буреныз ноны бирдыен шудыны тунсыко вал. Но чиньыос пӧртэм шӧдонъёсты кулэ каризы. Уллань васькыса, соос паллян ноны доры вырӟизы. Таиз ноны бирды бускелезлэн шудэзлы вожъяськыса кема улӥз ини, соин ик йӧтскемлы пумтэм шумпотиз.

— Озьыен, тон егит пияштэ сюлэмдэ буйгатон понна виид: бен, сопал дуннеын со шоры нокин но пиосмурт шоры кадь уз учкы. Вожъяськон — со адями сямлэн тодметэз, мон кемалась сое эскерыса улӥсько, котьку но паймисько, макем пӧртэм пумо луэ со вожъяськон, — малпанъёссэ шара вераса улӥз лыз пиосмурт.

Нош Мандрагола госпожалэн малпанъёсыз паллян ноны бирды котыраз интыяськемын вал. Со ноны ӧз тодылы нунылэсь небыт ымзэ, но ӟеч тодылӥз пиосмурт пиньёслэсь куртчылэмзэс.

— Со дыре ик тынад эшшо одӥг пиосмуртэд вал, отставкаысь Михей солдат, солы но тон яд удӥд. Так, серекъян понна: таиз но кулыса кошкоз меда шуид. Михейлэн чурыт солдат сиенэн чабиям кӧт ӝушез соку ик шодӥз эркиясь голькыт ядэз, сое берен поттыны быгатӥз, Михей ӧскиз. Саламедлэсь кема висьыса, со улэп кылиз ик.

— Ядлэн кужымез быремын вал ини, со кышкыт ӧй вал, соин ик мон сое сиенэ пони вал, ӧ гань-гань валэктӥз азьвыл ортчем ужез Мандрагола.

— Михей валаз сиёнэдлэсь «ӟечсэ», катьяськемез бере, тон доры ӧз ни пыра, — шуиз лыз пиосмурт.

Ӝыт понна Мандрагола госпожа нырысьсэ серекъяз:

— Ӧз ветлы ни Михей мон доры одӥг гинэ муген: висемез бере, со пиосмурт ӧй вал ни. Бен, солэсь азьло но со олокыӵе ик кужмо ӧй вал.

Паллян ноны вылысь ужзэ ки быдэстӥз, табере ӧз тоды: кытчы мыноно, кин сое вите на. Ки васькиз гурезьлэн ӵошкыт бамалтӥз, сюрес сое кышномуртлэн чырты дораз нуиз.

— Кышномуртъёс вылын но эскерид тон аслэсьтыд яддэ.

— Озьы дыр али, о-о! Тодӥсько ук мон: кышномуртэз нокыӵе яд уз вормы, лулъёссы соослэн азьвыл ик ини ядэн напчытэмын, соос асьсэос ядэз виыны быгатысалзы, — Мандрагола ассэ шонере поттыны быгатӥз.

— Мар кылъёс тон вераськод ачид кадьёс сярысь? — паймиз лыз пиосмурт. Со но дуннеысь котьмае тодыса вуымтэ на али.

— Кышномурт кышномуртлы тушмон, номыр уд кары. Тужгес но кышкыт луо матынъёсыз, эш шуонъёс, — улонэз тодыса шуиз Мандрагола.

— Огполаз тон виыны малпад бускель кышнодэ, сое тон одӥг-кык учог но пилиськем зенелик понна аслыд тушмон карид. Кыкетӥ полаз ужед пӧрмиз, матысез Люция эшед, чумаен висьыса, нылпиосыз сьӧры сопал дуннее кошкиз.

— Пичи экеослы бен мозмыт но, ӝожмыт но вал, дыр, сопал дуннеын анайзытэк улыны, — азьвыл ортчемзэ тодаз ваиз Мандрагола.

Векчи чиньыё ки вуиз кышномуртлэн чыртыяз, нянь буханкаез кадь сое кырмиз: бен, музъемвыл улонын та чыртыез юн кырмыса возёно, соиз зэм.

— Озьыен, тон малпаськод, эшшо одӥг ӟеч уж лэсьтӥд? — юаз лыз пиосмурт куаразэ воштытэк, каллен.

— Шонер улӥсь инме сюроз, пӧяськись кошкоз адлэн коросаз. Нокызьы тае уд вошты, али-а, бергес-а со вакыт вуоз, — тазьы малпаз пал кышно, чыртыысьтыз зибисьсэ шодэмез потытэк.

— Тыныд дунне пум сярысь вераны кыл сётэмын ӧвӧл, — шуиз пиосмурт. — Дыр, — тини со гинэ адямилэсь улонзэ мерта, адями уг быгаты сое дыртытыны.

«Со вожъяське, вылды, — малпаз Мандрагола, — мурт вожъяськонэз кема чакласа улэм адями гинэ тае вала. Лыз пиосмуртлэн аслаз эскеремез потэ дырен герӟаськем юанъёсты, нош татчы со лыктӥз, луоз, солэн ужъёсаз нырзэс чуртнасььёсты шонер улонлы дышетыны».

Малпалод, борддор пыр потыса лыктэм мурт кышномуртлэсь та малпанъёссэ лыдӟе:

— Мон кинэ ке дышетон понна уг ветлӥськы татчы, адями улон радэз но тупатыны уг тыршиськы, мынам тодэме гинэ потэ адями ужамлэсь мугзэ, малы соос озьы лэсьто.

Та кылъёсыз бере со госпожалэсь чыртызэ лэзиз, чырты вылэ кылизы куинь лызалэс чиньы пытьыос.

— Тон, адӟисько, ваньзэ тодӥськод ини: кызьы но малы мон ядэн сюди адямиосты, — шуиз Мандрагола, чыртызэ эрикоен шодыса.

— Но пияла-ӟенеликъёсыдлэн лыдзы дыр ортчемъя йылӥз гинэ. Таосыз тани — пудо-животлы, таосыз — пиосъёслы, таосыз — кышноослы. Вань-а меда монэ виыны быгатӥсез?

— Ӧвӧл, тонэ уд виы. Эскерытэк но тодӥсько, — ушъяз Мандрагола уй кунозэ.

— Озьы ик луыны кулэ. Ачим гинэ мон тодӥсько, марлэсь мыным кулоно. Но мон со сярысь нокинлы но уг вера.

— Эн вера, тынад улонэд мыным кулэ ӧвӧл, — лыз туганэныз соглаш луиз яд сурась.

— Тон шуид, мон котьмарлэсь но мугзэ тодӥсько. Бен, та дырозь ужъёсыдлы валэктон шедьтыны мон быгатылӥ ик. Отын мон отравлениосын ужан интые пуктэмын, соосты лыдъян-ӵотан — мынам уже. Святоен луэм уж бере татчы лыктытэк ӧйлась. Вера, малы тон сое виид?

Лыз ки ужъесызлэсь ӧз шуна, берлань сюрессэ со туж каллен мытӥз, малпалод, со кытчы мынэмзэ тодыса вылысь уг вера.

— Мар юанъёсыныд калме быдтӥськод, мынам уже тыныд кельшыны кулэ кадь, святоез виеме — тужгес но, — шуиз Мандрагола, лыз пиосмуртлэсь кышкамтэзэ возьматыса.

— Тон мыным вераса эн улы, мар мыным кельшыны кулэ, мар — ӧвӧл, — шуиз кышномуртэ эркиясь.

— Бен, тини озьы, табере коть ужед но вань, ужтэк уд пукиськы, — серекъяз госпожа.

— Малпаськод, мынам уже ӧжыт? Туннэ нокинэ ӧз ке но виысалзы, уже мынам трос луысал: азьвыл ортчемъёссэ лыдъян, ваче пуктон, эскерон… Но отравлениос уз дугдэ, мар веранэз. Азьпалась мон таӵе улонэз адӟисько: адямиосты сюэн-сюрсэн виыло, нош собере шуо: «Со кулэ азинскон но ӟеч улон понна».

«Та мурт вуонозэ но адӟе», — малпаз Мандрагола, лыз пиосмуртлэн уин со доры пыременыз данъяськыса. Со сяна, кышномурт данъяськиз на асэныз но. Бен, та лыз тодосчи дуннеысьтыз потӥз юри Мандраголалы луыса, солэсь лушкем шодонъёсаз бугыръяськыны, сое эскерыны.

— Нош мон кырсь ужъёсыд сярысь шара верай ке, мар шуысалыд тон калыклы, черк суд азе вуыса? — юаз лыз пиосмурт.

Бен, эскеронъёсаз солэн шодскымонэсь азинсконъёс басьтэмез потэ вал. Кӧй кӧт вылтӥ ветлӥсь киыз сярысь но озьы ик вераны луысал.

— Уд, тон нокинлы уд вера, — черектӥськиз Мандрагола, нырысьсэ солэн куараяз кышкан кылӥськиз.

— Соку вера мыным, кызьы ваньмыз вал.

Госпожа кышканзэ ӝог зибиз но шуиз:

— Священникъёс мон борды уз тэбине, со юбо йылын пукисез святой соослы адӟемпотостэм мурт вал. Со уго монастырьлэсь палэнскиз, нош дораз уногес огшоры калык ветлӥз, монастыре — трослы ӧжытгес. Святой номыр но ӧз куры, нош монастырь — трос куриз. Монастырь ушъяськиз адями лулэз капчиятонын ӟеч ужаменыз, ассэ та удысын номырин воштонтэмен лыдъяз.

— Озьыен, Афазиус адямиослы урод ӧй вал, соку малы тон сое виид? Оло, кин ке но тонэ косӥз? — лыз пиосмурт малпаськыны кутскиз, нош солэн киыз пырыны тыршиз кышномуртлэн пыд кусыпаз.

— Ӧвӧл, косӥсез ӧй вал. Учкы али мон шоры, монэ донгыса но вырӟытыны уг луы. Мар аслам йырам лыктӥз, сое ик мон пумозяз вуттыса ужало, шуиз ассэ дунъяны быгатӥсь кышномурт.

— Оло, та висись святой ӧз быдэсты тынэсьтыд вӧсяськыса куремдэ? Соин ик тон пунэмзэ берыктыны малпад?

— Мае мон куром? Адями малпам ужъёссэ ачиз быдэстыны быгатыны кулэ. Святой доры ветлон — со астэ буйгатыны амал гинэ. Кыӵе ке но уже уг ке быдэсмы, талы луыны быгатэ ог сю мында муг. Соин ик святоез янгыш карыны уг яра, вань мугъёсты вормыны уг ке луы, ма карод?.. — философие кошкиз госпожа.

Со пыдъёссэ каллен выретӥз, кезьыт килы пось мугорез шедьтыны каньылгес мед луоз шуыса.

— Озьыен, Афазий пукиз юбо йылаз, нош адямиос оскизы солэн юрттэмезлы. Мар уродзэ лэсьтӥз со тыныд, малы тон сое сопал дуннее келяд? — азьланьтӥз лыз пиосмурт, солэн киыз маялляз макес вискысь гонэз.

— Малы одно урод лэсьтӥз шуиськод? — паймиз Мандрагола. — Номыр но со мыным ӧз кары. Со кемалась визьзэ ыштэмын вал ини, юбо йылын пукыса. Со уг ни быгаты вал лэсьтыны маке уродзэ яке ӟечсэ. Нош вылӥ быгатонлыкезлы оскон — со ини оскисьлэн ужез.

— Ну, ярам, шуом, мар тон солы уродзэ лэсьтӥд? — юаз лыз пиосмурт, солэн киыз пыдъёс вискысь пичи ку шымыриосты йӧтылӥз, каллен вырыны дышем чиньыос пыр-поч ӧз ке но эскере соосты.

— Мар уродзэ лэсьтӥ мон солы! — шедьтӥз госпожа быльытӥськыны муг. Куараез ик солэн чигиськиз кадь, мукет луиз, пӧяськись. — Тон мар, малпаськод, мискиньлы умой вал пукыны со юбо йылын? Вырӟылытэк: зоре-а, шунды-а пиштэ. Огмы но инъёсын ӧм улэ на, но оскиськомы, отын умойгес луоз шуыса. Афазийлы бен, валамон ини, инмын ӟечгес луоз. Табере со отын дыр ини, шумпотыса, кизэ-пыдзэ вӧл-вӧл урдылыса кылле, луоз. Калык азьын комедия но пуктоно ӧвӧл солы отын.

— Мынам тодэмея, со монастырьысь мумиослэн камераязы кылле, — шуиз лыз пиосмурт. Со басьтӥз чиньыосыныз одӥгзэ ки улаз сюрем ку шимыриез, соин ик госпожалэн вожзэ поттыны мугез ӧй вал.

— Мугорыз отын, нош лулыз — инмын, — дышетыса кадь шуиз госпожа, — тон та ужъёсыз ӟечгес тодӥськод вылды.

— Вера мыным ужедлэсь мугзэ, сотэк мон дорысьтыд уг кошкы!

Бен Мандраголалэн лэземез но уг поты вал та адямиез. Кылъёсыз тэбинизы ке но, со понна киосыз ваньзэ лэсьтӥзы туж шонер. Чиньыос улон мурдалаосы пырем бере, кышномурт туж эшлыко шуиз:

— Муг ноку уг луы одӥг яке кык. Мар мон тыныд вераны кулэ? Бен, та онерелы мон дышем кадь но луи дыр, куддыръя мынам туж зол потэ одӥгысьтыз ке но пиялаысь ядэз кин ке но вылын оскалтэме. Макем тыршыса мон та пиялаосме бичай, эскери ук. Кышномуртлэн котьмае тодэмез потэ, бен, со озьы. Малпай: Афазий сокем бадӟым святой ке, яд сое виыны кулэ ӧвӧл. Нош осконэз юнматон понна трос ужаны кулэ. Тини озьы, та кылъёс тыныд табере тырмыт-а? Тодос понна кулэ ӧвӧл ке трос мугъёс, гожты тани тазэ.

Озьы шуиз Мандрагола лыз пиосмуртлы, со малпаз: «Святой но ассэ таӵе ик инлыко шӧдыны быгатысалыз, уго солэн улон инъетэз лул пушказ вал». Нош Мандрагола али быдэсак вал пиосмуртлэн чиньыосыз дорын. Малпалод, соос ӝоггес вырыны кутскизы, шуназы. Мандрагола огшоры луло маке ӧй вал, солы секыт вал зибыны пушкысьтыз вуоноезлы осконэз, азьланяз ваньмыз трослы тунсыко, — талы кышномурт туж оскиз. Но шӧдтэк шорысь пиосмурт ышиз-быриз. Мандрагола пушкы кылизы солэн лыз тулкымъёсыз гинэ.

«Ӧвӧл, пиосъёслы быдэсак усьтӥськыны ноку но уг яра», — малпаз пал кышно.

Веросэз пумозяз лыдӟе "Кенеш" журналысь.

Используются технологии uCoz