Тани лыдӟод,
номыр уд вера,
Юан сётод но вунэтод
Ноку уд тод:
Монэ погмаз
Толло нунал — 
Кытын тон вал?

— Адӟид-а, огшоры но жадьыса
Кошкиз нуналмы.
Шаплыгес одьял улэ.
Нош вужермы?
Жадем ни со, мискинь,
Киыз дырекъя,
Я солы кезьыт, я пӧсь…
— Я, мар сярысь тон, а?

Та йоно курадӟонэз чиданы!
Ӝутскыса, ярдурад жугиськыны,
Луоын вырӟылытэк кылльыны,
Утчаны синучконысь кадь инмысь
Сое, мар кыдёкын-кыдёкын.

Ӝужа сӥзьыл.
Шаплы вамышъёсын
Ми юиськом жингыртэмзэ чечы куарлэсь.
Ой, мар ке но луоз ни куспамы?
Курдан ӧвӧл со! Куректон ӧвӧл!

Ческыт чидантэм 
урод мылкыд –—
Усьымтэ лымылэсь
Мӧзмон,
Урмыса бызёнлэсь
шузимон
Шунытэд тынад.

Синкылитэм даурамы 
Тон сярысь пичи куректонме но мон утё,
Бурдо сямен лопыръяло
Пумтэм кезьыт шаеръёстӥ.
Вай мыным кидэ,
Чиньыостэ мон чупало.
Коня сильтӧлъёслы
Тонэн йыбырттомы ми.

Блоклэсь адӟем карыса. Кышно палан.
Куке Тӥ азям сылӥськоды
Сыӵе жадемын но сыӵе чебер,
Шуиськоды, пӧраны яратӥськоды,
Тӥледлы умой, шуиськоды,
Мынам потэ, Тӥледыз китӥды кутыса,
Со дыре нуыны,
Куке Тӥ вал пичи.

Тон борды ӝиптиськыны но,
Кылытэк
Машина ыргетэмез,
Адями черекъямез,
Тон борды ӝиптиськыны но
Кылыны:
Тон шокаськод зарезь кадь.

Луыло мон жамдэлы ке но дельфин,
Минутлы ке но, куке
Та чуръёсты гожтӥсько.

Куке паймымон уйвӧтэ,
Выжыкылэ мынам, мынам югытэ
Зэма —
Бубыли луыса лобасько.

Тынэсьтыд йӧтскемдэ шӧдыса,
Лымы пырыен небыт лымые
Мон васькисько.

Кыӵе пичи бадӟым дунне!
Даслэсь но трос ӧвӧл ук ваньмыз,
Ма дуно луыны быгатэ.

Вайёсыз но ми, выжыез но ми,
Одӥг писпулэн пушъетэз ми —
Лулмылэн дышетскисьёсыз.

Пичи дырысен тодмо кыл
Сюлэме пыриз —
Вань дунне
Пумитэ бызись
Нуны луиз.

Ярато шат эркиям понна?
Ву тулкымъёс, кудъёсыз луоез нюло,
Соос, огшоры, озьы уло.

Сюрес выламы котькудӥз —
Выль кизилилэн 
Югытэз.

Луллэн бурдъёсыз — льӧль уйвот.
Луллэн вордӥсь киосыз — йӧнатон.
Серекъян — луллэн гырлыосыз.
Кисыриос — луллэн сюресъёсыз.

О, кинъёс та куасьмем куаръёс?
Ма тодо соос ми сярысь?

Пересь бадьпу
Инме пыкиськыса,
Шыпыт вераз мыным
туж кулэез сярысь — 
Вӧсе кошкиз.

Кема учкыса сылӥсько
Жаг люкам шоры:
Кӧня отын пытьыоссы
Пӧртэм адямиослэн…

Пересь писпу 
лусьтро вал, сётскисьтэм.
Соку но,
Куке сое вандӥзы,
Со вал дӥсьтӥсь.
Кызьы нош сотэк:
Быдэс улонзэ со пилемен шудӥз,
Инэз кылзӥз.

Кыӵе секыт,
Куке кылбур кошке.
Адями кадь, зэмлык кадь,
Уйвот кадь
Лобаны.