УДМУРТ КЫЛБУРЕТЛЭН КӦНЯ КЕ ДАУРЪЕМ СЮРЕСЭЗ АДӞИСЬКЕ

А. ЛАПТЕВ

Арво Валтон (Валликиви) — эстон прозаик, кылбурчи, киноспенарийёс гожъясь. Вордӥськиз 1935-тӥ арын Эстониысь Марьямаа гуртын. Эстониын гурезь ужъя инженерлы дышетскыса вылӥ тодон-валан басьтӥз. Огдыре ик ялан тунсыкъяськылӥз философиен но литератураен. Кыкетӥ вылӥ тодон-валан басьтӥз на Москваысь культурая институтысь сценарийёсты дасясь люкетаз. Туннэ нуналозь витьтонлэсь уно книгаоссэ пӧртэм кылъёсын лыдӟись доры вуттӥз ини. Гожтэм ужъёсыз пӧлын — лэчыт веранъёс, кылбуръёс, миниатюраос, веросъёс, повестьёс но романъёс, нылпиослы произведениос. 1986-тӥ арын толсуре Арво Валтон Удмуртие советской литературалы сӥзем нуналъёсы вуылӥз. Та ужрадлы сӥзьыса куамын куать писательёслэсь улонзэс но творчествозэс возьматӥсь «Милям куноосмы» чеберак лэсьтэм буклет но потылӥз. Нош 1996-тӥысен Арво Валтон финн-угор писательёслэн огазеяськонзылэн тӧроез луэ. Та дырысен эстон мадёсчи эшшо но юнгес кусыпъёс тупатэ Россиысь ӵыжы-выжыосыныз — гожъяськись эшъёсыныз.

Берло вакытэ Таллинн университетысь кылысь кылэ берыкъясе дышетскись удмурт нылэн Надежда Пчеловодоваен кылзы тупаз. Удмурт лыдӟисьлы ӵошенназы соос эстон писательёслэсь кӧня ке чеберлыко книгаоссэс поттыса вуизы ини. Кылсярысь, таӵеоссэ: Арво Валтон. Веросъёс. Берыктӥзы Н. Пчеловодова, В. Ар-Серги, С. Матвеев, С. Самсонов, С. Любимова, В. Шибанов, П. Захаров. Ижеиск, «Эгес», 2003; Арво Валтон. Тынад нимыд вошъяськылэ. — Веросъёс, новеллаос, диалогьёс, кылбуръёс, лэчыт веранъес. Эстон кылысь берыктӥзы А. Валтон но Н. Пчеловодова. Ижевск, «Инвожо», 2003; Карл Ристикиви. Адямилэн улон сюресэз. — Кылбуръёс. Берыктӥз Н. Пчеловодова. Ижкар, «Инвожо», 2004; Эрнст Энно. Сюресчилэн ӝыт кырӟанэз. — Кылбуръёс. Берыктӥз Н. Пчеловодова. Ижевск, «Эгес», 2005; Кристьян Яак Петерсон. Та музъемлэн кылыз. — Кылбуръёс но дневникысь чуръёс. Берыктӥз Н. Пчеловодова. Ижкар, «Инвожо», 2005; Бетти Алвер. Инвис усьтӥськон вакыт. — Кылбуръёс. Берыктӥз Н. Пчеловодова. Ижкар, «Инвожо», 2005. Со сяна, Надежда Пчеловодова «Осконэ мынам» кылбур книгазэ но печатлаз ини (Ижкар, 2003).

Кемалась ӧвӧл та кык эшъёс Н. Байтеряковлэн чуръёсызъя нимам 455 бамъем «Азвесь лодка» удмурт кылбур антология Таллиннын поттӥзы. Отчы сю витьтон ньыль авторъёслэн быдэн одӥг яке кык удмурт кылбуръёссы пыремын но эстон кылэ берыктэмын. Гожъяськисьёслэн нимтулъёссы алфавитья интые вордскем арзыя радъямын Виктор Шибанов тодосчилэн та бадӟым книгаысь азькылаз пусъемезъя, кылбуретмылэсь кӧня ке дауръем сюрессэ возьматӥсь та выллем антологиосмы туннэ нуналозь ӧй вал на. Озьы сое дасясьёс удмурт литератураез кыре-буре, быдэс дуннее, потто.
Кылбуръёсты одӥг «липет» улэ Надежда Пчеловодова кык ар ӵоже люкам. А. Г. Шкляевлэн «Ӵашъем нимъёс»(1995), П. К. Поздеевлэн архивез, В. Л. Шибановлэн «Удмурт литературая антологиез» (2001) со вадес туж юрттӥзы. Уно текстъёс басьтэмын «Кенеш», «Инвожо», «Вордскем кыл» журналъёсысь но «Удмурт дунне» газетысь. Уже кутэмын Йӧскалык библиотекаысь шаертодонъя отделлэн каталогъёсыз, картотекаосыз но фондъёсыз. Нимысьтыз пусйыны кулэ Петров вынъёслэсь удмурт кылбуретлы сӥзем http://home.udmnet.ru/kylbur сайтсэс. Текстьёс басьтэмын егитьёслэн кылбур-веросъёсынызы сборникъёсысь но. Егитъёсыз кылбурчиос сярысь ивор шедьтыны юрттӥзы на журналист но кылбурчи Е. Виноградова но тодосчи А. Клементьев.

«Кылбуръёсты эстонкылэ берыктон ласянь учконо ке, вань ӵыжы-выжылуись кылъёс пӧлысь удмуртэз секытэз луэ, вылды, — антологилэн сьӧркылаз пусъе А. Валтон. — Мукет кылъёсын нырысетӥ слоге усись ударение татын берпуметӥез луэ, удмурт кылбуръёс туж ӵем гожъямын луо анапестэн, эстон кылбуретын со — шер учыр. Берыктыкум кылбурлэсь метриказэ но, рифма ласянь радъяськемзэ но усьтыны тыршисько».

«Азвесь лодка» антология асьме поэзимес золгес ӧръяны, азинтыны юрттоз шуыса оскем потэ. Нош эстон лыдӟисьёс удмурт кылбуретэн нырысьсэ йӧн-йӧн тодматскозы.