Огазе луо ке алнашъёс,
Вордӥське ни со, алнаш мылкыд.
Кылбуръёс, кырӟан гуръёс
Пырозы огпол сюлмад, соослэсь уд ӵыд.

Огазе луо ке алнашъёс,
Эзыла, бадӟым луэ сюлэм.
Огпол ке но шӧдӥд ке тон сое,
Луод мукет, калыкъёслэсь пӧртэм.

Огазе луо ке алнашъёс,
Луллэн пыдлось сӥез ик жин-н! вазе.
Сюлэмысен мукет сюлэм дорозь
Шӧдон, валан но яратон сюрес вордске.

Палэнысь муртлы потэ, дыр, валантэм,
Мар луэ, ваче луо ке алнашъёс.
Сюлмысьтым мон сӥзисько дуннеослы
Алнаш мылкыд, алнаш сюрес, алнаш гуръёс.

Алнашлэн данэз, шуо, табере пичи.
Алнашлэн данэз, пе, быриз-ышиз.
Со озьы ӧвӧл ук, алнаш дан кужмо.
Югыт ошмесэн со калыклы дуно.

Яке шуозы на: «Нош со алнашъёс.
Кытчы гинэ эн учкы, котькытын соос».
Алнаш со сыӵе ук: шуныт тӧлэн пельтэ,
Палэнысь муртэ но аслаз каре

Лёгалом, зӥбом, пе, алнашлэсь данзэ.
Даногес луом, пе, алнашъёслэсь.
Котькинлэн аслаз данэз, валамон.
Алнаш дан лул-сюлэмын со, капчиен уд лёг.

Алнаш дан сыӵе со: яке бичатэ,
Яке сюлэмад пыре но сяськаяське.
Эн потты вождэ, эше, алнашъёслы.
Трос садъёс улосамы мед сяськаяськозы!