БАЙГУРЕЗЬ КУЗЁ

Улэм вашкала дыръя одӥг визьмо Кылбурчи. Кылзэ вылэм шурлэсь жингыртзмзэ, ымзэ усьтыса ик учке вылэм лобись юсьёс, туриос шоры, чакла вылэм Инбамысь пилемьёслэсь тугаськемзэс, таркаськемзэс. Вылэм со Кылбурчилэн туж чебер милпанэз. Котькуд кылбуреныз вазиськиз со Инмарлы: огдырлы ке но лобаны мед быгато вал, Байгурезь крезез мед кыло вал, Гурезь кузёлэсь шудэмзэ мед адӟо вал, тылобурдо кылэз мед валало вал... Сыӵе куроньёсын нуналлы быдэ вӧсяськылэм Кылбурчи.

Оло зэм, оло даур, одӥг нуналэ Байгурезь вадьсын лобась тылобурдоос пӧлысь одӥгез васькем Кылбурчи доры но ӝутэм сое инбаме. Кылбурчи адӟем Байгурезь кузёез, кылэм солэсь крезьзэ, валам тылобурдоослэсь кырӟан кылзэс...

Шудэзлы пумтэм шумпотыса, огдыре ик туж жаляса васькиз Кылбурчи музьем вылэ. Но огдырлы тодмо луэм дунне Кылбурчилэн малпанъёсысьтыз тӧлӟымтэ ни. Вань адӟемзэ, кылэмзэ кылбур чурьёсы радъям но кулэм. Нош лулыз, тылобурдо луыса, Байгурезь пала лобем. Кин тодэ, оло, али но со тылобурдо шулдыртэ на Байгурезь котыръёсты...