ТӦЛПЕРИ

Куке-соку улэм, шуо, туж визьмо Туно. Котькыӵе висёнэз йӧнатыны-эмъяны быгатэ вылэм со. Пӧртэм турын-куаръёслэсь, будосъёслэсь ачиз ик эмъюм пӧзьтылэм-дасяллям. Верало на: ӵӧж чемонлэсь но, чечег йӧллэсь но эмъюм дасямез пумысь. Котырысь гуртъёсысь вань калык тодэ вылэм Тунолэсь кужмо луэмзэ. Адӟылӥллям Инмарен, Куазен, Кылдысинэн вераськемзэ но. Куазь сётэ, пе, Тунолы лысъёс вылын сылэтэм вузэ, Инмар лэзе вылэм лыз югытсэ, Кылдысин - пӧртэм сылалъёс ӵектылэм. Нош Тунолы эмьяськоназ туж кулэ луись тыл поттӥсь но йӧнатӥсь гудыри кӧльыез сётэ вылэм Тӧлпери. Оломалы Тӧлперилэн адямиослы туж вожез потылэм. Соку со вожомыса ик лекъяськылэм. Сильзорен, тӧлэн, гудыриен лыктылэм. Адямиос вылэ ӵашйылэм, висён алятэм. Со дыре ик Тунолы, ыстэм висёнъёссэ йӧнатыны шуыса, гудыри кӧльыос куяллям. Адямиос висьыны кутскыса Тӧлпериез тышкаськиллям. Нош Туно дорын гудыри кӧльыен йӧнатӥськыса бурмемзы бере, малпаськонэ усиллям: мар ай та таӵе, кызьы но мар улӥськом ай ми? Бӧрысь нош, Тӧлпери медаз лекъяськы, вожзэ медаз потты шуыса, солы вӧсяськыны ӧдъяллям. Улонзы выльысь ас ӧраз пырыса визылам.

Ортчизы вапумьёс... Тӧлперилы оскись но ышиз-быриз ни, нош Туно доры ялан кыстӥсько на адямиос.