ВУМУРТ

Куанер муртлэн пиез узыр доры кияр возьманы медъяськем. Киярзы шур дурын будэм. Но со пи уй но, нунал но огназ возьмалоз вылэм. Кияр возьмась крезь шудыны туж усто вылэм. Тылысаз уйбыт крезен шудыса потылӥз. Огпол уин, крезь сиен жингыракуз, тылысэз азьын кин ке но тыпыртон эктыны кутскем. Та пилэн сое адӟемез потэм. Ӵуказеяз ини кӧйтылзэ ӝуатэм но сое кияр бичан кудыеныз кымам. Ачиз выльысь шудыны кутскем.

Ӧжыт улыса, со азьын кин ке жильк-жильк карыса эктыны кутскем. Соку пияш кӧйтыл вылысьтыз кымам кудызэ ӝутэм но тыл югытэн адӟем: туж чебер ныл, пе, эктэ. Со ныллэн кошкемез луымтэ ни крезь шудӧсь пи дорысь. Эктӥсь ныл со пиез ассэ кышнолы басьтыны косэм. Пи кылзӥськем. Соку нылмурт валэктэм: "Тон мынам дорам вуид ке, "осто" эн шу, Инмарез буре эн вай! Тон "осто" шуид ке, атайлэн улэм-вылэмез асьмелы уз пот ни...". Собере ныл пиез сьӧраз нуэм. Мыно, нош азьпалазы нокыӵе гурт но, юрт но уг адӟиськы, пе. Пи юам: "Кытын юртэд но, гуртэд но?" Ныл шуэм: "Шедьтом, эн гинэ юалляськы". Вуиллям шур дуре. Ныл вуэз киыныз чапкем но, ву соку ик вайяськем. Со вайяськеме кыкназы ик пыриллям. Ныллэн атаез пилы ӝӧк вылэ кык тусьтыен уксё пуктыса пирдан сётэм, пудо-живот но туж трос ӵектэм. Пи отысь кошкыку, сьӧраз туж трос пудо-живот потэм. Солы паймыса, пи ымзэ усьтэмзэ шӧдытэк кылем: "Инмаре, кытчы тэрыса улэм тамында ваньбур?!" Пи озьы шуэм бере, ву пась ваче ворсаськем, потӥсь ваньбур ваньмыз потыса вуымтэ ни. "Малы озьы шуид? Аслам шедьтэм ваньбуре гинэ потыса вуиз, атайлэн чик потыса ӧз ву", - ныл куаретэм пиез.

Собере пи доры бертӥллям, нылэз черке пыртӥллям, сюан ортчытӥллям. Соослэн сюаназы мон но син-юи. Сӥлы карыса утялтӥзы: калык юиз чаркаен, нош мон - пась кобыен. Со пи вумуртлэн нылыныз туж узыр уло. Вузкаро дуно вузэн - бирдыен но каптырнаен.