УЙВӦТ

Кык пияшъёс ӵошен тэляны мынӥллям. Лумбыт ветлыса, трос пӧйшур шедьтӥллям. Куазь ӝытмем бере, тылскыса кӧлыны выдӥллям. Огез сием-юэм бераз соку ик умме усем. Мукетыз, умме усьыны вормытэк, чал-чал кыллись эшезлэн ческыт иземез шоры учкыса улэм. Кӧня ке дыр ортчем бере, изись эшезлэн ымысьтыз бубыли потэм но лобӟем. Тае адӟыса но кошкемаса, умме усьымтэ пиосмуртлэн уйбыт синъёсыз кыниськылымтэ ни. Куазь сактытозь вырӟылыны дӥсьтытэк кыллем. Нош ӵукна со бубыли выльысь эшезлэн ымаз ик пырем.

Югыт луэм бере эшез но султэм. "Мар вӧтад ни?" - юам кӧлымтэез. Соиз вӧтамзэ верам: "Уйбыт олокытӥ ветлӥ... Отын пичи шур вань ук, со шур дурысь сандыкен зарни адӟи". Мукетыз солэсь верамзэ пеляз понэм. Угось пичи шурез ӟеч тодэ вылэм. Малпам: лулыз бубыли луыса лобакуз, зэм адӟемзэ вера шуыса.

Собере тэлетӥ нуназеозь ветлӥллям на. Уйзэ изем пи гурт пала кариськыны малпам. Мукетыз шуэм: "Мон ӧжыт ветло на..."

Люкиськиллям. Нырысетӥез гурт пала сётӥськем, мукетыз пичи шур пала кариськем. Шур доры вуэм но адӟе: егит ныл эмезь бичаса ветлэ. Тодматскиллям. Кӧня ке дыр ортчыса, сюан ортчытӥллям. Соослэсь шудоез нокин но гуртазы ӧвӧл, пе.