Укмыс ар куспын – дас куинь книга

Эстониын «Финн-угор поэзиысь классмъёс» сузьетын книгаос пото но пото. Соос кие кутымон зӧкесь, чебер бумага вылэ печатламын. Кылбуръес кык кылын сётэмын: гожъяськисьлэн кылыныз но эстон кылын. Та сузъетлэн автореныз Арво Валтонэн вераськиз Надежда ПЧЕЛОВОДОВА.

- Арво, «Финн-угор поэзиысь классикъёс» сузьетысь нырысет? книгады 1996-тӥ арын потӥз. Малы со борды басьтӥськиды?

- Эстониын 1996-тӥ арын ортчиз финн-угор писательёслэн ньылетӥ конгрессы. Петер Домокошлэн дэмламезъя со сӥземын вал чеберлыко литератураез берыктонлы. Конгрессын шуизы: та малпанмы вераськонэн гинэ медаз кыльы, ог-огмылэсь литературамес ӟечгес тодоно, Нырысетӥ книгае пыризы тужгес тодмо кылбурчиослэн гожьямъёссы: Иван Куратов, Виттор Нӧбдинс, Сергей Чавайн, Кузебай Герд но Ашальчи Оки. Нош огъя финн-угор поэзия сярысь статья гожтӥз Эва Тулуз.

- Малы бен одно ик со авторъёслэсь кылбуръёссэс бырйиды?

- Соос ваньзы ик, шуыны луоз, поэзилы кутскон сётӥзы. Книгалы ним но шедьтӥ Кузебай Гердлэн кылбурысьтыз: «Ӟардон азьын». Кылбуръёсыз нырысь ик бырйизы гожъяськисьёслэн доразы, собере - берыктӥсьёс, асьсэлы кельшисьёссэ, берло ини ваньзэ сое пуж пыртӥ сямен поттӥ мон.

- Нош та сузьетысь кыкетӥ книга, «Тулыс ӵукна», малы 2002-тӥ арын гинэ потӥз?

- Та кык книга вискын кылдӥз на эшшо одӥг сузьет: «Финн-угор нылкышно кылбурет». Та книгаосты поттон азьын мон тодматски ӟеч гожъяськись удмурт кылбурчиосын: Татьяна Черноваен, Алла Кузнецоваен, Людмила Кутяноваен но Галина Романоваен. Озьы луыса кошкиз: удмурт нылкышноослэн кылбуръёсынызы книга борды ваньмызлэсь азьло кутскемын вал, но берло потӥз - 2002-тӥ арын, нош поръёслэн, комиослэн но мордваослэн - 1998-тӥ арын.

- Книгаос ваньмыз одӥг зӧктаесь, 250-300 бамъемесь, котькуд кылбурчилэн 25-30 кылбурез пыремын. Нош кин соосты эстон кылэ берыктӥз?

- Коми кылысь ми Лесло Тунгалэн ӵош берыктӥм, эрзя но мокша кылысь - Пеетер Волконскиен ӵош, пор кылысь - ачим. Алла Кузнецовалэсь кылбуръёссэ берыктӥз Эллен Нийт, Людмила Кутяновалэсь но Галина Романовалэсь - Валеериа Вилланди, нош Татьяна Черновалэсь - мон. Кылбурчиослэсь кылзэс одӥгез но уг тодо, соос ваньмыз кылысь кылэ берыктэм (подстрочник) вылысь лэсьтэмын.

- Нылкышно кылбурчиослэн сузьетсы, шуом, ханты, манси кылын азьланьтӥськоз на-а?

- Уз. Воргорон гожъяськисьёс серекъяса сямен юазы вал ини пиосмурт кылбурчиослэн сузьетсы сярысь. Тани соос потӥзы ини кык книгаен: «Тулыс ӵукна» но «Гужем нунал».

- Кыкетӥ книгае кинъёс пыризы?

- Сталин вакытэ репрессие сюрем пор, удмурт, мокша, эрзя, коми-пермяк но зырян писательёслэн кылбуръёссы. Нош соослэн литературазы сярысь гожтӥз Эва Тулуз.

- Жаль, сое лыдӟыны быгатоз эстон кылэз тодӥсь мурт гинэ.

- Книгаез мон эстон лыдӟись понна поттӥсько. Эва Тулузлэн статьяосыз ми дорын туж дуно, но со малпанъёс та книгаын поттэм кылбурчиослэн калыксылы вылесь ӧвӧл ни.

- «Финн-угор классикъёслэн поэзизы» сузьетысь куинетӥ книгалэн нимыз «Гужем нунал». Малы?

- Кылын шудон гинэ со: «Ӟардон азьын», «Тулыс ӵукна», «Гужем нунал». Оскытӥсько: та сузьетысь ньылетӥ книгалэн нимыз «Сӥзьыл ӝыт» уз луы. «Гужем нунал» книгаын потӥзы война бере будэм гожъяськисьёслэн эрзя, ханты, манси, пор, мокша, ненец, коми-пермяк, коми-зырян, удмурт кылъёсын 180 кылбурзы.

- Марий Эл, Коми кунъёсын но, Финляндиыи но табере финн-угор кылбурчиослэсь гожъямъёссэс поттыло ни. Но соос – одӥг кылын гинэ.

- Милям со ик луэ аспӧртэмлыкмы. Кык кылын поттэм книга тунсыкогес. Но текстъёсты бичаны шугьяськонъёс кылдо, янгышъёс луо. Озьы ке но кык яке тросгес кылын книгаос поттон сярысь сюлмаськоно, амалъёс утчано.

- Таӵе малпанды Венгриысь книга поттӥсьёслы но кельше.

- Бен. Ашальчи Окилэн но Кузебай Гердлэн кылбуръёссы отын удмурт но венгер кылын потӥзы. Ашальчи Окилэн книгаез табере Эстониын но потӥз. Солэн вань гожтэм кылбуръёсыз «Ӧжыт лыдъем калыклэн бадӟым литератураез» сузьетын печатламын. Та сузьетын ик потӥзы Иван Куратов коми классиклэн, Прокопий Явтысо туала ненец кылбурчилэн гожъямъёссы.

- «Финн-угор поэзиысь классикъёс» сузьетысь ньылетӥ книга кыӵе луоз?

- Со сӥземын луоз туала кылбурчиослы. Поттыны малпаськом финн-угор писательёслэн укмысэтӥ конгрессылы. Но отчыозь потыны кулэ этнофутурист писательёслэн гожъяменызы книга. Сое дасяз Юлле Каукси.

- Та книгае удмурт кылбурчиос пӨлысь кинъёс бен пырозы?

- Удмурт кылбуран удысысь выль ӧр сярысь ке верано, нырысь ик - Пётр Захаров, Виктор Шибанов, Рафит Мин, Сергей Матвеев но трос мукетыз. Пӧлазы вань алигес гинэ гожъяськыны кутскисьёс но. Тросэз егитъёс пыризы «Азвесь лодка» антологие но (та сярысь газетамы гожъямын ни - ред.)

- Мар пӧртэмлыкез туала удмурт поэзилэн, дуннелы мар со тунсыкозэ сётоз?

- Юанлы таӵе юан сётыны луоз: бизнес но реклама сяна, туала урмем дуннелы мар меда тунсыко потэ? Литература нырысь ик кулэ аслыз калыклы. Шунды ӝужан пал финн-угор литератураос пӧлын удмуртъёслэн егит поэзизы тужгес асп?ртэмлыко но тунсыко. Одӥг гинэ ӵектонэ вань: образ ласянь егитъёс дӥсьтӥсьгес мед луысалзы, гожъян амалазы тӧдьы стихез но кутыны медаз кепыралэ вылэм.

- Нош азьпалан кыӵеен адӟиськоды удмурт поэзиез?

- Малпасько: дунне поэзилэн сюрес вылаз со дӥсьтысагес, паськытгес вамышъёсын пыроз.

- Гожъямез книгаен поттыны туннэ дуно усе. Оскон вань-а, удмурт кылбуръёс лыдӥись доры вуозы, сое мукет кылъёсы но берыктозы шуыса?

- Ваньмыз асьмеос бордысь потэ. Дунне культура пушкын сяськаяськись культураен кылён понна котькуд калык ачиз сюлмаськыны кулэ.

- Кылбуръёсыз кыӵе кылысь берыктыны секытгес?

- Мон сямен, удмурт кылысь эстон кылэ берыктыны тужгес секыт. Ударение берпум слоге усе, анапест амалэнгес гожтэмын. Эстон кыллы со уг тупа.

- Луэ-а кылбурез мукет кылэ берыктыны, солэсь быдэсак пуштроссэ, авторлэсь мылкыдзэ, гожъян манерзэ кельтыса?

- Уг, дыр. ӟеч гожтэм кылбурын огшоры кылъёс сьӧры ватӥськем мае ке мукет вакытэ, мукет культураын будэмъёс тросэз уз но валалэ. Но котькуд берыктӥсь котькуд кылбурысь со тунсыко мае ке шедьтыны, усьтыны тырше.

- Укмыс ар куспын - 13 книга. Мар тӥледлы юрттэ, кужым сётэ?

- Яратон. Шонергес вераса, финн-угор калыклы юрттыны тыршон. Асьмеос ог-огмы сярысь ӧжыт тодӥськом. Чеберлыко литература калыклэсь лул-сюлэмзэ возьматыны-усьтыны быгатэ. Наукалэн но, публицистикалэн но сыӵе луонлыксы ӧвӧл. Соин ик ог-огмылэсь гожъямъёсмес тросгес берыкъяно, лыдӟоно. Адямилэн аслаз кылыныз лыдӟиськемез мед потоз шуыса, дуннеысь литературалэсь узыклыксэ солэн анай кылыныз дэмлано.

Печатламын «Удмурт дунне» газетын (14.12.2005)