Чеберлыко эстон литератураез удмурт кылэ берыктон

Эстон литератураез удмурт кылэ берыктон бордын пӧртэм аръёсы ужазы уно удмурт кылбурчиос, прозаикъёс но тодосчиос. Туннэ вераськыны луоно ини эстон кылысь берыктэм ужъёслэн ӟечлыксы сярысь, но таяз учыре ойдолэ учком, кызьы азинскиз чеберлыко текстъёсты эстон кылысь удмурт кылэ берыктон уж, кыӵе эстон писательёслэн ужъёссы берыктэмын удмурт кылэ. Эскеронмылы инъет луиз Удмурт йӧскалык библиотекаысь шаертодон каталог но фонд.

Эстон литературалэн удмурт лыдӟись доры вуэмез герӟаськемын Эстонилэн но Россилэн азинскеменызы, историенызы, ваче кусыпъёсынызы. Совето вакытэ эстон литератураез удмурт кылэ берыктонлы муг но, луонлык но луылӥз, кылсярысь, СССР-лэсь кылдэм нуналзэ пусъён. Озьы «Молот» журналын 1972-тӥ арын «СССР-лэн кылдэмез дырысен 50 ар тырмон нуналэз дано» пумитаса «Вынлыко семьяын» рубрикаын «Эстония – Советской музъем» нимын печатламын эстон кылбурчиослэн – Аугуст Аллелэн (1), Ральф Парвелэн (12), Арви Сийглэн (16), Минни Нурмелэн (11), Юхан Смуллэн (18), Пауль-Эрик Руммолэн (15), эстон прозаикъёслэн – Март Раудлэн (13) но Арво Валтонлэн (3) – удмурт кылэ берыктэм ужъёссы. «Молотын» ик 1982-тӥ арын «Данъяськы, эрико Родинамы милям!» ним улын сётэмын Латвиысь, Киргизиысь, Таджикистанысь н.м. интыосысь 15 кылбурчиослэн удмурт кылэ берыктэм ужъёссы, соос пӧлын ик – Арви Сийглэн одӥг кылбурез (17).

Тунсыко, кызьы со вакытэ «Молотын» сётэмын берыктӥсьёс сярысь ивор. 1972-тӥ арысь публикациысь тодмо: Аугуст Аллелэсь Совето страналы сӥзем кылбурзэ берыктэм Гай Сабитов. Нош мукет кылбуръёсты берыктӥсьёс сярысь гожтэмын: «Берыктӥзы Г. Сабитов, Ф. Васильев, С. Перевощиков». Таӵе эсэпен ик «Молотын» сётэмын мукетъёсыз удмурт кылэ берыктэм кылбуръёс но. 1982-тӥ арысь публикациын берыктӥсьёс сярысь тодӥськомы таӵе гожтэмысь: «Кылбуръёсты удмурт кылэ берыктӥзы Н. Байтеряков, Г. Сабитов, П. Поздеев, В. Романов, В. Ванюшев, В. Ившин, Ф. Пукроков, Г. Архипов, А. Уваров, В. Шибанов» (17). Соин ик «Кин берыктӥз татын печатлам эстон кылбурчилэсь Арви Сийглэсь кылбурзэ?» юанлы валэктон сётыны уг луы. Сыӵе амалэн 1990-тӥ аръёсы но ай ужаз «Советской Удмуртия» газет но, татын печатлам Леело Тунгаллэн (19) кылбурезлэн берыктӥсезлэн нимыз лыдӟисьлы тодмотэм кылиз.

1980-тӥ аръёсы эстон но удмурт литература кусыпъёс юнмало Тартуын дышетскем удмурт тодосчиослэн тыршеменызы, текстъёсты берыктон уж мынэ кыксэ ик кылэз тодыса, ӟуч кылэз уже кутытэк. Озьы Т. Перевозчиковаен берыктэмын «Кикы» нимо эстон калык выжыкыл (7), Б. Загуляева но В. Ившин берыктӥзы Калле Муулилэсь кылбуръёссэ (8).

Кылысь кылэ берыктон ужлы инъет ӵемысь луэ гожъяськисьёслэн ваче эшъяськонзы но. Эстон но удмурт литература кусыпъёсты пӧртэм дыре радъязы нырысь СССР-ысь писательёслэн съездъёссы, егит гожъясьёслэн семинаръёссы, Эстониысь но Удмуртиысь писательёслэн союзъёсынызы радъям ужрадъёс, 1989-тӥ арысен – Финн-угор литератураослэн ассоциацизылэн о:тчамъёсыз, 1994-тӥ арысен – Эстониын ортчись этнофуту гожъясьёслэн семинаръёссы.

Озьы, 1963-тӥ арын Москваын ортчись егитъёслэн семинаразы тодматскыса, кылди:з С. Самсоновлэн но А. Валтонлэн ваче берыктон ужзы. Семён Самсоновен берыктэмын вал эстон прозаиклэн Арво Валтонлэн «Осётр чорыг» (3) но «Вуж сюрес» веросъёсыз, кыкез ик соос печатласькизы 1972-тӥ арын, эстон писательлэн Удмуртие вуылэмез бере.

1988-тӥ арын удмурт писательёслэн делегацизы вуылӥз Эстоние, со сярысь гожъяз Г. Ходырев «Советской Удмуртия» газетын. Татын ик сётэмын Юхан Лиивлэн «Дорам» (9) кылбурез, кудзэ удмурт кылэ берыктӥз В. Котков, делегацие сюрем одӥгез кылбурчи.

1996-тӥ арын «Удмурт дунне» газет Финн-угор литератураослэн ассоциацизылэн Эстониын ортчись но берыктон ужлы сӥзем ӧтчамезлы шуыса эстон литературалы сӥзем быдэс бам печатлаз: «Калевипоэг» эстон калык эпосысь оглюкетсэ берыктӥз А. Перевозчиков (6), Эллен Нийтлэсь кылбурзэ берыктӥз Т. Чернова (10), Арво Валтонлэсь «Шайтанлэн туганэз» вероссэ берыктӥз В. Сергеев (5). Та финн-угор литератураосты берыктонлы сӥзем нимысьтыз ӧтчам ортчем бере (отчы вуылӥзы удмуртъёс Фома Ермаков, Зоя Богомолова, Анатолий Уваров, Анна Зуева, Виктор Шибанов, Татьяна Чернова) (20) Эстониын бӧрсьысь бӧрсьы потӥзы эстон кылэ берыктэм удмурт, пор, мордва н.м. кылбуръёсын книгаос (соос сярысь: http://nadimy.narod.ru/uzh1.htm ), Йошкар-Олаын – пор кылэ берыктэм кылбуръёсын финн-угор бичет (14); бергес ке но, Сыктывкарын коми кылын финн-угор кылбуръёсын книга потӥз (21) (озьы ик http://unatlib.org.ru:8101/content/folk/finougr/fin4htm). Жаляса верано луэ, Удмуртиын та выллем книга ӧз поты али но.

Соин артэ шумпотымон адске этнофуту гожъясьёслэн семинаразы ветлэмъёслэн туала чеберлыко эстон литератураез берыктон бордын ужамзы. «Инвожо» журналын 2000-тӥ аръёслэн кутсконазы потӥзы Аапо Ильвеслэн, Олави Руитланелэн, Юлле Кауксилэн кылбуръёссы (соосты берыктӥз П. Захаров) но А. Уусталулэн веросэз (берыктӥз Р. Лаптева). 2001–2203-тӥ аръёсы та семинаръёсын быдэстэм берыктэмъёсты «огазеяз» Тартуын потэм «Neiu ja karu» – «Ныл но гондыр» книга (ним понэмын удмурт кылбурчилэн но тодосчилэн Виктор Шибановлэн одӥг кылбурезъя) (25). Та книгаын удмурт кылэ берыктыса сётэмын финн, эстон, коми гожъясьёслэн кылбуръёссы. Вераломы татчы пырем эстон кылбуретысь нимъёсты гинэ: Кристина Эхинлэсь кылбуръёссэ берыктон бордын ужазы Ирина но Лариса Ореховаос; Яан Каплинскилэсь ужъёссэ берыктӥзы Виктор Шибанов, Пётр Захаров но Ирина Орехова; Кивисильдниклэсь – Виктор Шибанов; Каукси Юллелэсь – Светлана Любимова, Пётр Захаров но Ирина Орехова; Аапо Ильвеслэсь, Олави Руитланелэсь – Пётр Захаров но Ирина Орехова (http://www.finugor.ru/newws/index.html#n6367 ).

2003-тӥ арысен «Инвожо» журналлэн редакцияз потыны кутскиз эстон литературалы сӥзем книга бичет (серия). Та ужлэн кичӧлтӥсез но радъясез луиз Арво Валтон, тодмо эстон прозаиклэн удмурт кылэ берыктэм ужъёсыныз книгаен (4) ик кутскиз серия но. Собере потӥзы эстон кылбурчи классикъёслэн Карл Ристикивилэн (27), Кристьян Яак Петерсонлэн (26), Бетти Алверлэн (22), Эрнст Эннолэн (24) кык кылын (эстон оригиналэн но удмурт кылэ берыктэмен) кылбур бичетъёссы. 2005-тӥ арын та ялымтэ сериын потӥз Арво Валтонлэн веросъёсыныз но новеллаосыныз бичет (2), берыктон бордын ужазы Н. Пчеловодова, П. Захаров, В. Ар-Серги, В. Шибанов, С. Матвеев, С. Любимова. Татчы ик пыремын С. Самсоновен азьвыл берыктэм веросъёс но.

Адӟиськомы, удмурт лыдӟисьлы ӵектэмын эстон литератураысь тужгес но тодмоосыз нимъёс, тужгес но чеберъёсыз произведениос: калык эпосысен, выжыкылысен кутскыса кылбур классикаозь, туннэ нуналэ модной луись нимъёс но кылбуръёс дорозь.

Умой луысал верам ужъёсты – газет-журналъёсын пӧртэм аръёсы печатласькемъёссэ – нимаз книгаен адӟыны; ярасал, соос огазеямын луысалзы ке нимаз журнал номере. Умой луысал, газет-журналъёсамы луысалыз ке удмурт кылэ берыктэм чеберлыко дунне литератураез печатлась, соин артэ ик – удмурт литератураез пӧртэм кылэ берыктэмъёсын тодматӥсь сэрег-рубрика. Уно аръёс ӵоже вераськиськомы, кылсярысь, эстон калыкен ӵыжы-выжы луэммы сярысь, кӧня но ум ветлӥське, кылсярысь, Финн-угор писательёслэн ассоциациезлэн ӧтчамъёсаз! Но, малпасько, ог-огдэ шӧдон-валан ворскыны кулэ чеберлыко литератураез берыктон ужын но. Уго чеберлыко литератураын – та югыт, эрикез гажась выжы калыкмылэн лулыз.

Библиография

1. Алле, Аугуст. Вордӥськем шаерлы: Кылбур / Берыктӥз Г. Сабитов // Молот. – 1972. – № 10. – Б. 21.
2. Валтон, Арво. Веросъёс / Берыктӥзы Н.Пчеловодова, В. Ар-Серги, С. Матвеев, С. Самсонов, С. Любимова, В. Шибанов, П. Захаров. – Ижкар: Эгес, 2005. – 141 б.
3. Валтон, Арво. Осётр чорыг / Берыктӥз С. Самсонов // Молот. – 1972. – № 10. – Б. 32–36.
4. Валтон, Арво. Тынад нимыд вошъяськылэ: Веросъёс, новеллаос, диалогъёс, кылбуръёс, лэчыт веранъёс /Берыктӥз Н. Пчеловодова. – Ижкар: Инвожо, 2003. – 150 б.
5. Валтон, Арво. Шайтанлэн туганэз: Верос / Берыктӥз В. Сергеев // Удмурт дунне. – 24.08.1996.
6. Калевипоэг: Эстон калык эпосысь / Берыктӥз А. Перевозчиков // Удмурт дунне. – 24.08.1996.
7. Кикы: Эстон калык выжыкыл / Берыктӥз Т. Перевозчикова // Дась лу! – 7.02.1981.
8. Муули, Калле. Нылпи сад уин. Зор корка. Кӧлон азьын: Кылбуръёс // Кизили. – 1989. – № 10.
9. Лиив, Юхан. Дорам: Кылбур / Берыктӥз В. Котков // Советской Удмуртия. – 20.01.1988.
10. Нийт, Эллен. Мон кожай вал: Кылбур / Берыктӥз Т. Чернова // Удмурт дунне. – 24.08.1996.
11. Нурме, Минни. Уг тоды мон возьытэз: Кылбур // Молот. – 1972. – № 10. – Б. 30.
12. Парве, Ральф. Асьме улон: Кылбур // Молот. – 1972. – № 10. – Б. 29.
13. Раут, Март. То:лопу: Верос // Молот. – 1972. – № 10. – Б. 22–29.
14. Родо-тукым улына / Сост. Г. Г. Гадиатов, Г. М. Пирогов. – Йошкар-Ола, 1996. – 271 с.
15. Руммо, Пауль-Эрик. Ж:ытазе. Лыкты лабрес кызьпу доры: Кылбуръёс // Молот. – 1972. – № 10. – Б. 31.
16. Сийг, Арви. Малпаськон: Кылбур // Молот. – 1972. – № 10. – Б. 30.
17. Сийг, Арви. Уй тылъёс: Кылбур // Молот. – 1982. – № 12. – Б. 14.
18. Смуул, Юхан. Чорыгась серекъя: Кылбур // Молот. – 1972. – № 10. – Б. 30.
19. Тунгал, Леэло. Атыкай-аныкай му // Советской Удмуртия. – 16.09.1990.
20. Уваров, А. Кам ярдуре шуккиськозы выль тулкымъёс // Удмурт дунне. – 24.08.1996.
21. Уна рӧма сикӧтш / Сост. В. В. Тимин. – Сыктывкар, 2002. – 286 с.

22. Alver, Betti. Tahetund = Инвис усьтиськон вакыт: Кылбуръёс / Берыктӥз Н. Пчеловодова. – Ижкар: Инвожо, 2005. – 92 б.
23. Eesti kirjanduslugu / E.Annus, L. Epner, A. Ja:rv, S. Olesk, E. Su:valep, M. Velsker. – Tallinn, 2001. – 703 lt.
24. Enno, Ernst. Randaja ohtulaul = Сюресчилэн ӝыт кырӟанэз: Кылбуръёс / Берыктӥз Н. Пчеловодова. – Ижкар: Эгес, 2005. – 85 б.
25. Neiu ja karu. – Tartu, 2005. – 185 lt.
26. Peterson, Kristian Jaak. Selle maa keel = Та музъемлэн кылыз: Кылбуръёс но дневникысь чуръёс / Берыктӥз Н. Пчеловодова. – Ижкар: Инвожо, 2005. – 84 б.
27. Ristikivi Karl. Inimese teekond = Адямилэн улон сюресэз: Кылбуръёс / Берыктӥз Н. Пчеловодова. – Ижкар: Инвожо, 2004. – 120 б.